Fastenpredikt 2010

Peterskirchner Fastenpredikt 2010

von Bruder Markus

Iaz ziag di o – geh wart hoid schnoi

I woas ned wos i oziang soi

Des is doch heid na wirkli wurscht

Geh weida iaz i hob an durscht

De braun oda de schwarzn Schuah

Was passt den bessa zum Gwand dazua

Des is mia gleich iaz ziag oa o

Des Starkbier laft da ned davo

Do werst nachad eh wida vui zfui dringa

A Krautdella fressn und moang recht stinga

Geh schmarrn – da dring i a ned mera

Wia da Schelina – der vertragt hoid mera

Do mias ma zerst schaun wer mera vertragt

Bis dann da erste untan disch drin flackt

Geh weida iaz – ziag de schwarzen Schuah o

Warum ned de brauna – de daugn ma besser fast no

Dann hoid de brauna – segt ma eh ned vo da weiden

Geh glabts das du konst di a gar ned entscheiden

Jetzt kimm wei sonst hamma zum Schluss no zspaad dro

Geh - D Wimmer Maria kimmt gwiss noch uns no

Außerdem lassens uns so fria gar ned eine

Und wia i an Andre kenn – griagst eh nix vor 9e

Jo freile heia is doch auf 2 Tag verteilt

Am Freitag zum vorglühn und am Samstag dann gscheid

Grad dass no mera sauffan und no mera speim

Oder geht des vom Wirt aus wei so vui Norgerl überbleim

Und von wegen du- zwoa dog hinternand

Du bist ja nach am Schützenabend scho so schlecht beinand

Dassd di woigelst und drahst und gjammert muas werdn

Geh weibe iaz huif ma i glab i muas sterbn

Und an ganz schlechte Dog – da kimmts nachad vor

Iaz ziag endlich d´Schua o – sonst geh i aloa

Moansd dass da Woishuaba heid wida was verzählt

Vo de ganzen schlechten Leid des gibt auf dera Woid

Oder moansd dass er mi dableckt – des werd ja dead ned passiern

So brav wia i oiwei bin – du miad a dengaschd scho liang

De red und red dass es nix anders ned kennts

Du machst ja de Ratschweiber vom Theater Konkurrenz

Do dad i ma ja da Sünden fiachten – aber hobn werd a di

Weisd du oiwei so saufst und dableckt wer dann i

Es saufts doch a – des segst bei da Ortner Karin

De hod nachm Weiberfasching – zwengs na Bauchgripp hods gspiem

So – und iaz gemma – sonst kemma as gred

Und moang fahrma zum weko – obsd du magst oder ned

Grias eich alle midnand zum 5ten Peterskirchner Starkbierfest.

Da Wirt is zkloa wordn wia ma segt und desweng hoast heier 2 moi o-zapft is. Über 350 Leid was letzt´s Jahr einawoitn is hoid einfach zfui fia unser Wirtshaus, weils da genau aso zamgracht wia unsern junga Selbstständigen an Schelina Gerhard sei Gummiwagn mid dem er so vui Hoiz vom Oacha zu eam ummafarhn woit, dass sie beim Gerenger des hintere Drum vo seim Wag´n selbstständig gmacht hod und as Feld aussegrennt is. Wär ois ned so schlimm gwen wenn ned an dem vordern Drum des no am Bullog droghengt is a Farbkiwe draufstandn war der a wiederum ganz selbstständig de ganze Hinterseitn vom Bullog ogmoin hod. Quasi a doppelter Spasseffekt fia den ders gseng hod. Aber zruck zum Wirtshaus. I häd ja gmoand dass mia uns von Seiten der Gemeinde her ned so schwoam lassen, an Dachstui vom Kirchenwirt um 3 Meter 50 aufmauern damit ma ob´n umma a Galierie ziang kinnan, so dass ma nächst´s Jahr 534 Sitzplätze obieten kantn. Aber naa - da Burgermoasta hod si moi wida vo de Tachertinger Gemeinderäte wia da Dobler Christa und an Disterer Franz Broadschlagn lassen dass ma des Geld liaba fia de Tachertinga hernimmt und dene an größeren Christbaum sponsort weil der vo 2008 angeblich da greisligste zwischen Passau und Berchtsgaden war. Und nachdem da Hellmeier Hans laut eigenen Aussagen dahoam no an greban Bam hod – hod´n s Mitleid packt und er hod eana nachgebn Eiso nix mid da Galerie, aber d´hauptsach an Wirt gibt’s. Sonst dad´s ja so Gschichten gar nimma geb´n wo da wo unsere Theaterspieler Gerauer Tobi und da Stauderer gerhard besser bekannt ois Batz´n total bsuffa vorm Wirt beim bisln draust stehn. Sagt da Batzn: woasd was i ned versteh Tobi? Warums iaz bei mia plätschert und bei dia ned – des is ganz ofach sagt da Tobi, weil du a d´Mauer hisoachst und i auf dein Mantel.

In da heirigen Fastenpredigt hab i ma denkt dass i moi de ganzen Peinlichkeiten de de Leid so übers Jahr machan ned erzähl, weil des ja eigentlich gschead is. So dad i zum Beispiel nia sagn dass sie da Ortner erwin und da Schwitze beim letzten Böllerschützenfest unter dem Vorwand si san krank abgseilt ham aber danach am Fuasboi und am Kirtag seng wordn san. Oder dass d´Hintermoia Gabi iaz neie Prioritäten setzt und bei na Fahrt in de Therma liaba an Sekt midnimmt anstatt an Bikini. Oder dass unser Orgnist da Mayer Andi oan Dog nach hl 3 kini ned in da Kircha war, weil er gmoand hod es is Montag. Des is des geh – im Winter is koa Bundesliga und schwups woas er nimma welcher Tag welchana is. I dad a nia sagn dass ma bei am Kaffekranzl beim Watsche sein Kuacha selber midbringa mua. Oder dass bei da Schmid Brigitte dahoam iaz an Christ in Weiss endn Konkurrenz mach woin und sämtliche schwer alkoholisierte Pubheimkehrer a Bett anbieten. Stammgäste san da eigene Bua samt seine 11 Apostelfreind. Oder dass d´Freidsmiedl Rosi da Ortner Erika an Gschenkkorb zum 60ga bracht hod, daweil is dÉrika erst 59e wordn. Aber do hods Erika wenigstens selm gwusst. Da Andre hod an seim Geburtstag überoi umanandverzoit dass er 54 wird – erst um 2 in da fria iss eam dann kemma – „ach ich werd ja doch erst 53.“ Des is fast wia bei da Angeklagten wo´s da Richter gfragt hod: Name: Greszenzia Schwanglbrunner. Beruf: Hausfrau: Alter: 29 Jahr und a boa Monat: Wia vui Monat. 138.

So wenns es nix dagegn habt´s dad i sagn – iaz dring ma nomoi gehmas o des ganze.

Politik:

Bei ana fastenpredigt wärs eigentlich mei Aufgabe a 3 ad hoib Stund über Politik und Wirtschaft zum sinniern aber nachdem i des nia so guad hibringa werd wia a zach Tobi nach da 4ten Hoibe Weisbier hab i den Gedanken wida foin lassen. Eiso red i hoid über was wo i mi auskenn – somit dauert de Predigt a maximal no a Stund. In da Politik is des Jahr a nix sonderlich neis passiert: Mia ham moi wida de größte Neiverschuldung seit Bestehen der Bundesregierung – wia eigentlich jeds Jahr – de CSU verspricht Steuersenkungen – wia eigentlich jeds Jahr – und mia ham bei de Wahlen moi wida de Leid gwählt über de ma zwar s ganze Jahr schimpfen de ma aber zumindest scho moi kennan – wia jeds Jahr. Aber mia san hoid ned alle so gscheid wia da hellmeire Peter senior der aus seine Fehler lernt und auf da Kranzbinderfeier vom Freitsmidl sagt : iaz war i scho 2 moi bei dia, und jeds moi bin i danach de Treppen auffegrabbelt - des pasiert ma nimma: Stimmt, des Jahr hamsn auffedrogn. Na, bei uns kimmt a jeda der oamoi in d Politik is immer wieda zu am Amt. Da Schäuble – oder da Sigmar Gabriel – immer de gleichen – des is wia wenn i in da fria in mei Unterhosen eineschau und sag – Ach – oamoi geht’s schon o. Mit der personellen Situation und de Wahlen an sich kon hoid ned immer jeder zfried´n sei.

Bei so´ner Wahl kon jetz wirklich nix schlechters passiern – ois wia dass de Gelben und Schwarzen regiern – wia mas a draht es geht eigentlich ned schlimmer – so leidet und stöhnt das gehirn von Franz Wimmer.

Mein Gott, Franz wer versteht scho de Wähler von heid. Schwierig is eigentlich grad fia unsere Nachbarn, so woas da Sarkozy jetzt nimma ob a unserer Kanzlerin oder unserm Außenminister an Begrüßungskuss gebn soi. Wenns nachm Kaltenhauser Joe ganga wär hätt er am Wahltag sicherlich gelb blau gwoit, weil da Joe is nämlich direkt vom Pub aussa ins Wahllokal und hat zerst moi einen 45 Minütigen Bericht über die nahezu galagtische und außerordentlich bemerkenswerte Leistung unseres TSV am Tag vorher berichtet. Fia alle de in der Zeit agrad ned beim Wähln warn hod er dann dieselbe Vorstellung nomoi beim frühschoppen gebn und gega Mittag rum is er dann gseng wordn wia er unserm Fräulein Bauer kurz vorm Schuieingang nomoi ala Sportschau a Kurzzusammenfassung zu dem Thema gebn hod.

Krise

Außer de Wahlen hods ja a des Jahr ned vui anders gebn als Krise. Sogar die Chinesen ham uns jetzt ois Exportweltmeister überhoid. De gloan schwarzhaarigen Gribben. Do klauns uns unser Wissen und unsre Infos und dann verkaffan ses saudeia. Aber heidzudogs koma ja sogar fia a CD voi Namen an Hauffa geld verlanga. Aber wissts wia ma in so ana Krise a gloans Vermögen macha kon –genau Aus am großen Vermögen.

Natürlich miassn a de Bauern untn der dera Krise leiden und zoang eanan Protest indems Mille über de Wiesn und Äcker verschütten. Da bleibts natürlich ned aus, dass sie der ungehobelte absolut nichts verstehende Großstadtmensch lustig macht über uns heraußn mid so schlechte Witz wia:. Warum ham Bauern Kinda immer fuiz gloane Schua – damits vo gloa auf as jammern lernen oder Warum ham Bauern so große Nasenlöcher – ganz einfach: Wei d´Luft umsonst is

Dass sie diese Krise aber wirklich auf uns alle auswirkt kon ma in folgenden Beispielen seng. De Lehner Elfriede fahrt eines Nachts im Zuge einer sparsamen Fahrgemeinschaft d´Hoiznerin und de Gruaberin hoam und natürlich stellt sie beim Hoizner unten an Motor aus um ned unnötig beim aussteigevorgang Diesel zum verbraucha. Bloß bled dass dieser Aussteigevorgang durch a ca 2 einhalb stündiges Gespräch so dermaßen in d´Läng zong word´n is dass ihra bei ihrm Mercedes de Batterie lar worn is. Spartip für die Zukunft meine Damen. A im Finstern kon ma sie unterhalten .

A da Moashamer Hans denkt in Krisenzeiten wirtschaftlich und schlagt somit seiner Frau da Irmgard vor sie kanntn eanan Wellnes Urlaub doch um oan Dog verkürzen. So häd´n si si oan Tag Urlaubskosten gspart und außerdem kamadns dann scho am Donnerstag hoam wo zufällig auf Nacht da Schafkopf Stammtisch wär.

Da Buchner Stefan spart an de Bruinglasl und so ließt er an am Gschäft ob´n Massenfertigung anstatt Maßanfertigung. Geh Stefan – sitzten 2 Blinde auf da Parkbank – sagt da oane hhzzz – sagt da andre – hey mach ma a oane auf.

D´Muassna Marille spart a enorm – und zwar an Kopfweh Tabletten weil sie de eh niaa braucht. Des blede is grod dass sie doch ab und zua amoi da Kater blagt und dann miassn oiwei d Schelina Kinder auffekemma und ihr a boa Aspirin bringa.

Da Jungbauer da Geiger Done hod si beim letzten Preisplattln sei Hemad dreckig gmacht. Sparsam wia er is hod er aber a koa zwoats dahoam und hod somit selber waschen und dann ano mid am feichten Hemad plattln miassn. Da Ufo Hansel legt 2 Streifen hintereinander beim schiassn ei damit er bei da Hälfte Patronen doppelt so viel Punkte schiaßt. Da Ecker Roli verzichtet komplett auf a Radl weil er eh oiwei mit dem vom Pub hoamfahrt des grad vor da Dia steht. De Wimmer Franzi spart sich die Fahrtstrecke in´d Werkstatt und rennt deswegen glei direkt beim Schmid Sepp aufn Gelände mit ihrm Auto gegan Mähdrescher. Und zu guter Letzt spart sie dHoizner Simone sogar as denga, sodass vom letzten Festl hoam auf oamoi 6 Leid vor ihrm Auto gstanden san, und d´Melli hod im Kofferraum hoamfahrn miassn..

Jaja „helfa duads nix, aber kosten a nix“ hod d ´Bäurin gsogt und hod am Dirndl an Osch ausghaut.

Fia de Bauern dene´s ganz schlecht geht gibt´s dann eh grad no oa Möglichkeit wieder auf Geld zum kemma. As fernsehn. Bauer sucht Frau war scho fast de bliebteste Sendung im letzen Jahr.

Immer Montags vo Viertel nach 9e bis umd viertel nach 10 segt ma da so absolut weltfremde mit Recht überbliebne Jung oder a Oidbauern de sie von boa so Stadtweiber der Brusthaar ausreißen lassen oder mid ihra Kuacha bachan. Aus reinen Recherche Zwecken hab i mir des moi a boa moi ogschaut und hab mid entsetzen festgstellt dass diese zwanghafte Frauensuche nur von dem her kimmt weil heid den armen Bauern Kindern ned moi mehr de Nachbarsdirndl vorgstellt wern. So fragt doch glatt da Ecker George voller erstaunen seine Freind wia eana Aigner Kathi übern weg lafft. Hey wer isn des ? de hob i ja no nia gseng. Ja guad, wohnan ja doch 143 Meter ausanand de 2.

Jaja heid zu Tag kons scho sei dass ma moi was ned glei auf Anhieb dasegt. So moand doch glatt de Greanauer Rese dass beim Woishuber dahoam am neia Haus an Rundum Balkon griang. Dawei is as Grüst no gstandn. A da Otten Flo hod moi was überseng wia er nachm Furtgeh hoamgfahrn is, sei Auto in Garage gstellt hod und erst wia er im Bett war gspannt hod dass er an Bax vergessn hod der oiwei no auf da Rücksitzbank schlafft. Do häd i dÓtten Lore gern gsehn wenns am nächsten Tag furtgfahrn wär. Aber i sag ja: man kon schomoi was vergessen nur dumm derfma ned sei. So wia unser Fuaballer da Asböck – wia er zuständig gwesn wär fürn Eiskoffer. Nachdem er aber aus Vergesslichkeit einfach koane Eiswürfel eigfrorn hod – hod er ned lang überlegt und gfrorne Erdbeern aus da Gfrierdruga vo seina Mama hergnumma. Hod gwiss a scheens Buidl obgebn wia er des an Irl Hanse ans Schienboa ghoitn hod. Wia hoast so sche. Besser heimlich schlau – aus unheimlich dumm

Sport:

Wo ma grad beim sportln warn. Im Sport geht´s ja oiwei wuida zua heid zu Dogs. Da segt ma zum Beispiel in am Championsleuge Spui einen Herrn Lehmann der zamt seine dicken Handschua mitten unterm Spui selenruhig hinta de bande hintresoacht –eiso wirklich - und da Ecker Roland miassad 30 euro zoin bloß weil er in Kufstoa a Mauer obiselt. „Geh heasd du konst ja do ned a d Mauer zuawebisln – des kost 30 euro „ hod da Gendarm gsagt. Drauf gibt eam da Ecker Roli 35 euro. „Fia was is der 5a zfui“. I hab an Schoas ano lassn

Aber zruck zum Sport: A boa ganz Prominente woitn unbedingt wida in de Presse des jahr. Da Schuhmacher zum Beispiel oder der super Golfer da der Tiger Woods . nanana – da griagt des neun-Loch Spiel glei a ganz a andere Bedeutung…

Jedenfois wird in Peterskirchen a kräftig gsportelt und nachdem Fuasboi und Tennis ned jedermanns Sach is ham si da ganz neie lustige Volkssportarten ergebn. A Bewegungssportart zum Beispiel. Hunde Suchen mit Familie Steckermeier aus Schwoshub – was ned grad Sport sondern a genauso guad a 324 Folgen dauernde Telenovela auf Super RTL hätt sei kinna – jedenefois ham Schwoshuber Leid den Scherer Hund verlorn wias auf den an Nachmittag hättn aufpassn soin. Zwoa Dog lang hamsn überoi gsuacht und erst da Jung scherer hod´n dann selm vui späda zufällig beim joggen gfunden. Hoasd ja ned umsonst Jog mid Doc.

A da Andre is bei uns jetzt sportlich aktiv. So is er beim Stockschiassn quasi unersetzlich und verwirrt alle Leid mit so Aussagen wia: Der Ammberger hat mich antan. Wennd´n da Amberger Sepp odo hod. Und im Pub is letzens passiert dass 2 Gäste gsagt ham „ Hey Andre, des Bier hast iaz aber schnell bracht“ Ja genau – und jetz schwitz ich wegen euch –hod da Andre gsagt.

Aber des is ja alles bekannter Sport. Was nei is und sehr zum empfehlen is extremes Ballonfahren. Hintergrund is der dass da Hellmeier Peter junior mit seiner christa a Ballonrundfahrt unternumma hod um über ganz Bayern zum fliang, aufgrund vo de Windverhältnisse sans aber in de 2 Stund bloß von Stangern bis nach Rumering kemma. I dad vorschlagn es geht´s beim nächsten moi wida Spaziern – da kemmts weida. Und was sportlich a ned so zum Empfehlen is. Extremes Dekorieren – wie im Hause Köck. Oder wenns scho gmacht werdn mua dann wenigstens mid Stahlkappenschuah weil da Melle is letztens erst a Glaskugel so saubled auf´n Fuaß gfoin dass sie sich de große Zeh brocha hod. Jaja von wegen draußen auf´n Bau is gfährlich– de meisten Unfälle passiern im Haushalt

Apropo Bau beim Tom. Seit dene Bau und Umbauten beim Köck beim Andre und beim Schwoshuber Sepp is de Trendsportart „Schüttboxfahrn“ ganz groß im Kemma. Des ganze schaut dann so aus dass sie 2-4 Leid in so a Schützbox auf guad Deitsch a eiserne Graffekistn einesitzen, si mim Kran selber ganz auffeziang und somit an wunderbaren Rundblick über Peterskirchen genießen. I sag amoi is billiger wia a ballonfahrt und segst genausovui. Da Hellmeier Peter senior hod des ois moderner Mensch natürlich a glei ausprobiern miassn –setzt ich in de Betonbombe vom neia Nachbar an Schwoshuber Sepp und fahrt si selbst zum Nussenbrocka an Baum auffe. Bloß bled dass eam obn dann da Akku Krankastl leer wordn is.

De letzte Sportart is bisher nur oamoi ausprobiert wordn und zwar vo de de Feiawehrler an Hoizner Bax und da Köck Tom. Diafseedaucha im Taufkirchner Goldbach – samt Uniform und Kappe. Eiso do foit ma nix mehr ei. Aber da Schmid Sepp sagt ja oiwei ma soi seine Löschwasserstellen in und auswendig kenna. Ja de Feierwehrler – Da Miana heini laft mim Löschanzug d´Strass entlang des segt a Preiss der hoidn auf und fragt: Wohin des Weges du Mann des Feuers“ ? drauf da Heini „Zum Herd des Brandes du Loch des Arsches“ - Lösch ma amoi wida

Randale

A Thema des immer schlimmer wird in unserer heitigen Zeit is die Gewalt. Ob des iaz Jugendliche U-Bahnschläger san, a verwirrter Papstattentäter oder oana der mit am Betonklotz am Fuaß im Meer versenkt werdn mecht und deswegn an Berlusconi a Miniaturausgabe vom Mailänderturm in´d Fresse haut – is gleich – wia vui oide Weiber immer song „Mei Bua d´Welt is schlecht – pass bloß auf dassd ned unter d Radl kimmst!

Ja a bei uns is des ned anders. Do warn iaz im Winter so Trickdiebe unterwegs de Geldbeutel und Handys aus Autos aussaklaun. Da trick von dene Leid is der dass sie de immer de Garageneinfahrten suachan wo zwar an Hauffa leid da san, aber vo lauta feiern koana aufpasst so wia beim Schwitze. Dawei brauchad ma beim Schwitze eiso wirklich nix stoin weil der doch eh immer sein ganzen Gruasch und Sperrmüll vor d´Hausdia legt mid am Schuidl zu verschenken. I wart ja grad drauf dass er no wia bei de Blumenwiesn so a Blechtonne aufstellt mid am Schuidl – pro Glump an Euro.

Aber ned nur Diebe ham mir moi wida in Peterskirchen sondern a an Sprengstoffattentäter. So sprengt da Langlechner Franz doch glatt die ganze Eingangstreppen vom Pub mit ana so übertrieba Menge Sprengstoff, dass de Drümmer am Vorsammer sein Dach ob´n no de Schindel eischlagn und an Andre rückwärts an grabn einehaut. D´Straß war natürlich ned abgsperrt - Bloß guad dass mia den oiden Raiffeisenturm friara ned gsprent ham, sonst dad ma heid no z´Buchöst enden de Drümmer zamglaubn.

Wos natürlich a a ganz a klarer Fall von Randale und Ruhestörung war, war de firstbaumfeier beim Köck Tom seim Hausumbau. In dem gloana bauwagen dens im garten steh ghabt ham is so dermaßen umanandablead wordn dass da Küther Roy wia er um 1 zum biseln aufgstandn is no a hoibe Stund am Fenster den nächtlichen Gesängen glauscht hod.

A neie in Auftraggegebene Studie hod übrigens ergebn dass Agressivität und Randalismus von am gloan runden gläseren Gegenstand her kimmt, der für gewöhnlich ois Aufbewahrungsmöglichket für Zigarettenasche und Stummel hergnumma wird. Auf guad deitsch – ashcurln vor allem in Kombination mit Alkohl is saugfährlich bringt uns aber seit langem moi wida a gscheide boarische Wirtshausschlägerei ei wo ma Freind und Feind ned ausanander kennt und de oanzigen Gewinner alle de Stui san de ned brocha san. I kon ma genau vorstelln wia des glaffa is. Da Cramer werd an 60ga am Krawattl ghabt ham. „Helle vui trennt die nimma von am Voideppen“ und da helle wird glacht haben und gsagt ham – genau Cramer – nur no der Disch zwischen uns zwoa. Übrigens had da Leithi am nächsten Tag an 60ga ogruafa und ganz verwundert gfragt ob er woas warum dass eam sei Rippn so weh duad.

Mittelpunkt

Dass des natürlich Dorfgesräch nummer 1 am Silvester vormittag war koma si vorstelln. Alle hams gwisst nur da Andre no ned, weil der hod des ganze moi wida verschlaffa.

Bei sechane vorbilder is natürlich de Jugend immer im Zugzwang und mecht sich was beweisen – ganz egal in welcher Form des dann zur geltung kimmt. Schließlich mechan a sie a moi im Mittelpunkt steh.

So sagt da schelina Christian es glangt nimma wenn ma an hauffa Bier und Schnaps dringa kon, und sauft nach da Treibjagt aus ana Sektflaschen Diesel.

Des san eigentlich so Aktionen wo im Fernsehn a schwrzer Balken kemma dad mid da Aufschrift – bitte nicht zu Hause nachmachen. Aber i glab im Namen vom Christian kon i des heid offiziell verkünden dass des vielleicht doch a Scheiß idee war, weil seine Koppal am nächsten Tag no brennan. Eigentlich häd ja bloß a bissl middenga braucha und a Biodiesel dringa des häd si vielleicht besser mim Magn vertragn

De Galneder Vroni vo Brandstätt mecht a im Mittelpunkt steh und macht zum 18ten Geburtstag a festl bei ihra dahoam. 100-200 Leid soin kemma eiso bestellt sie beim Buchner die hoffentlich ausreichende Menge von 80 Karton Cognac. Fia alle de des ned wissen – des san 480 dreiviertel Liter Flaschen. Eiso entweder sie hod damit grechnet dass spontan no 2300 Jugendliche ausm Tachertinger Jugendtreff samt eanam Anführer an Heigermoser Helmut kemman, oder sie hod damit grechnet dass da Amberger Gerhard und da Schwoshuber Joesi auf an Sprung vorbeischaun, oder si hod gar ned grechnet – oder und des is des was i glab – sie woit einfach nur des Gsicht vom Buchner Sepp fotographiern wenns am nächsten Tag 78 volle Karton wida zruck gibt und des Buidl dann bei Deutschlands dümmstes Gschau an de Bild zeitung verkaffa.

Jaja d´Hauptsach es geht nix aus gell …“Macht nix, i hab no oane – hod de Pfarrasköchin gsagt und hod am de Bischof de Brat´nsoß übern talar gschütt…

Weiderhin im Mittelpunkt steh meachan de 12 Apostel und lesen bei da Weihnachtsfeier vom TSV a boa Gschichten aus eanam Tagebuch vor. Wobei i sagn mua de arbeit hätten Sie si sparn kinna wenns stattdessen oan Aufnacht im pub mid da helmkamera rumglaffa wärn und hädn des Video dann herzoagt.

Da Ober Helle von Oinham mecht ganz protzig in a absolute In-Discothek. Wia eam da Türsteher sagt „du derfst do ned eine, des is nur für Stammgäste“ is da Ober ganz geknickt und stellt de treffende Frage „Ja wia soi i den stammgast werdn, wenn i no ned moi einederf?

Aber a a jung gebliebener erkennt endlich sei großes Talent. So meld si da Reinhard alias Tago Binder 2010 endlich bei Wetten Dass o mid dem Vorschlag. Wetten dass ich Geldscheine am Geruch erkennen kann. A da Hellmeier Peter is bei da Sendung dabei mid da Wetten: Wetten dass i mei PV Anlage a auf da Sonnenabgewandten Seite raufbaun kon und da Fuchsreida Seppe wett dass er in seim Koffer fia schießbekleidung mehr Gwand nei bringt ois wia Ortner Erika in ihrn Kleiderschrank.

Mei Mama woit a moi herzoang dass sie jetzt den technischen Fortschritt des Handys erlangt hod, und lasst sie daher ganz protzig mitten unter der Predigt beim Vereinsgottesdienst von ihra freindin da Bernauer Martina oruafa. Ohne vorher auf Lautlos zum stelln natürlich sonst griagts ja wida koana mid. Genau des gleiche is am Brunnwirtsmiche passiert aber ned in da Kircha sondern verkleidet ois Nikolaus in da Grundschui. Guad dass da Miche aus Theaterspieler guad improvisiern kon weil so hod hod er si drauf rausgred dassn da petrus grad ogruafa hod, er soi eam doch auf´n Hoamweg a Leberkassemme midnemma.

Wichtig macha woitn sie a da Hoizner Bax und da Schamoia Brugge wias mid da Hoizna Simone und da Osl Susi hinter am Auto nachgfahrn san. Nachdem eana des z´langsam ganga is hams einfach des Auto überholt, des rechts zuawegwunga und oan auf Zivilpolizei gspuit. Bloß bled dass bei dem ganzen Manöver de Göbl Birgit dawischt ham de de 2 natürlich in eanam Rausch ned kennt ham.

Unfreiwillig wichtig gmacht hod sie a unser richtige Polizistin de Schindler Ali, de beim einparken wieder moi Klischees erfüllen woit und da in a Parklücke reigfahrn is wo hoid scho a anders Auto gstand´n is. Wias dann de Versicherung ogruafa hod ham de gmoand si soi si doch bei da Polizei melden, was dÁli zu dem Verzweifelten Ausspruch „i bin doch de Polizei“ hinreißen hod lassn. Ja de polizei is hoid ned oiwei da richtige Ansprechpartner . Ruaft oane mitten bei da Nacht bei da Feierwehr o und sagt. Es miassts schnell kemma bei mia mecht oana as Fenster eisteign: Ja da muast de Polizei oruafa, de helfan da da weida sagt da Feierwehrler– naaa sagt sie – so miasts scho es kemma weil d Loadda is z´kurz.

Krankheiten

Ja meine liaben Leid a ganz a aktuelles Thema san de Zusatzbetiräge der Krankenkassen de ma im Moment griang. 8 euro soiad da jeda no zusätzlich zoin wovon 4 euro Verwaltungsaufwand san. 8 euro head si ned vui o, aber aloa mit dem Geld was da vo de Peterskirchner zamkimmt kannt ma so sinnvolle Investitionen macha wia an, a Polstergarnitur für a Schüttbox, a Aggressionstherapie fürn Cramer und 60ga oder an christbaum fia Tacherting …Aber de Kassen kinnan ja fia den Zusatzbeitrag a nix, schließlich is a ganz a neie Krankheit umd´Welt ganga - die Schweinegrippe. Aber wia song da unsere Jungbauern Gerenger Seppe und co : Liaba Schweinegripp von na geilen Sau ois wia BSE vo ana dumma Kuah. I woas ja ned obs ebba im Radio ghead hod aber de Boman Katrin hams a sauba derbleckt zwengs dera Grippeimpfung. Do is na vom Spasstelefon gfragt wordn ob ma bei der Grippeimpfung de ganze Familie midbringa derf eiso Josef Maria und s jesuskindl – vielleicht sogar no mid Ox und Esel. Aber de Katrin hod des Wortspiel mit da Grippe natürlich glei durchschaut – wobei i ma jetz da herinn ned sicher bin ob des jeda auf Anhieb verstanden hod. Da gibt´s nämlich so Kandidaten die sich sehr leicht verarschen lassen: So zum Beispiel geschehen bei da Becher Theresa, de ganz neigierig beim gloan Markus nachfragt was diese zwei Stempen mit ana Dachlatten drauf beim Wiringer im Feld bedeiten soll. Logisch hod da Markus gwisst dass des fia de Bussarde zum auffesitzen is aber anstannt d Wahrheit zum verzoion backt da Markus mit vollem Ernst de Gschicht aus, dass auf Grund von Erdölknappheid in der Welt iaz a beim Wiringer nach Öl bohrt wird. Leider hod des de Theresa ned nur glabt, sondern a no mit voller Stolz und Mitteilungsbedürftigkeit – wo sie aus Vererbungstechnischen Gründen quasi nix dafia kon – de Gschicht ano alle Leid des droffa hod weider erzählt. Bis ihra de Familie dann danna endlich auf de Sprünge ghelfa hod – und sie an Markus boid an Kopf obgrissen häd. Jaja wia host so schee. Wenn ma as Mei hoid moanan alle ma is dumm – aber wenn ma redt wissens es gwiss.

Ja jedenfois geht´s bei da Familie Becher ned immer so boshoft zua. Letztens hod nämlich de ganze Familie Becher da Rese einen geschenkgutschein überreicht. Und zwar für ein Wochenendseminar zum richtigen erlernen des Aufstellens einer Scheideltristen. Beim Becher is nämlich erst amoi Hoiz gmacht wordn und da hod si d´rese ohne sich dreipfuschen zu lassen der Aufgabe gewidmet diese eine Scheideltristen aufzumrichten, de dann saubledaweis kurz drauf wieda umgfoin is. D´Rese is si ja immer no ned ganz sicher ob des ned de Theaterer warn de de ganze Tristn umgschmissen ham. Oder da Wiringer hod doch a Ölquelle obohrt und des rumort iaz a so unter da Erde dass umgfoin is. I mei Theorie is ja dass de Scheidl extra umgfoin san weils dann nomoi vo da Rese aufgricht wern und a bessere Unterhoitung kon ma si ois Hoizscheidel einfach ned vorstelln.

Apropo Unterhaltung. Sitzen de zwoa Trachtler da Auer Franz mid eha redlade wissts ja eh und da Brunnwirtsmiche mid eher gar koa Haar wissts ja eh midnand am Tisch. Auf oamoi fangt da Franz o an Miche wega seina Glatzen zum dablecka. Ja sog amoi auf deina Plattn kinnan ja d´Leis Schlittschua laffa. Des juckt an Miche gar ned. Da Franz duad weida: mei du hast as schee, du konst di ja mim Waschlappen kampen . Duad wida nix. Ja soga amoi so a Platten wia deine hob i ja no nia gseng – hod denn dia da Hergott koane Haar ned midgebn: jo scho – sagt da Miche aber de rodn woit i ned.

Gesundheitswahn:

Iaz mua i eich scho amoi fragen? Liest von eich wer de Bunte oder de Brigitte oder de Tina, Bild der Frau, de Joy , de Laura, de Vital de Woman lifeline – apotheken umschau . gesundheits ratgeberde Beathe Uhse … haha hob i eich dawischt geh na i moan de ganzen Gesundheitsratgeber oder wias sunst no alles hoasn. Na, samma uns doch moi ehrlich . Es draht sie doch in dene Zeitungen alles nur no um den Gesundheitswahn, der egal welches Körpergewicht dass ma hod zerst amoi a 300 Tage Krautsuppendiät vorschreibt bei dera ma a nur deswegn abnimmt weil oam beim Anblick vo dem Batz scho da Leberkas auffakimmt. I wett mid eich dass in da heitigen Fittnessgesellschaft bei ana Umfrage weniger Leid wissen dass BRD für Bundesrepublik Deutschland steht ois wia FDH für Friss die Hälfte.

Ja samma uns doch moi ehrlich. Wer braucht den diesen ganzen Scheiß Sport. Warum soi i mi jetz draußen schinden und bei irgendeinemm sauwedda übern Fuasboiplatz laffa, wenn i des ganze a im Fernseher oschaun und dazua no 4 Hoibe dringa kon, gell Herr Becher. Und is ned jeder von uns scho moi vom Sport enttäuscht wordn? Do mechst beim Westerholzlauf a 8 km Bestzeit laffa und dann gibt’s so unfähige Streckenposten de de auf an foischen Weg schickan. Und erst die Gefahren de´s beim Sport gibt. Do kons sei dass´d du 7 Kasten Bier zoin muast blosd weilsd an Hoibmarathon laffst und du aber no zgwambert bist dassd de Zeit schaffst mid dera wosd vorher protzt host wia a Hawe Madde. Oder des laffa an sich. I mecht ma gar ned vorstelln wia a Hellmeier Pidi im Winter draußen um d´Lindenstraß joggen soi – wenn der scho Probleme hod dass er nach´m furtgeh ausm Auto aussakimmt ohne dassn a so schmeist dass´n gstreckter Längs auf de Teerstraß haut.

Ja genau und dann is ma wida verletzt und liegt beim Doktor – so wia unser Bauer Paul do unten. Der beim Schadhauser drin hoibads nackt auszong auf da Liege auf sei Rückenmassage wart und was is. De Putzfrau hodn schließlich gfundn weil alle Ärtzte scho hoamganga san und eam einfach vergessn ham. Oder da Buchner Christan: Um sich für sein ersten Theatereinsatz vorzubereiten fangt er um 3 Nammedog beim Joesi seina Firstbamfeia as Rüscherl dringa o. Zecht dann beim Wiesa auf da Party durch bis um 5e a da fria verbringt dann an ganzen Vormittag mit ana Mischung aus Schlaffa und Speim um seina Stimm den richtigen MotoradfahrerAkzent zum gebn, um im Theater möglichst authentisch zum wirka– ja Leid. Wann hod so ein Mensch Zeit dass er Sport macht. Ma braucht nämlich scho a gewisse Zeit wenn ma zum Beispiel an Wegahof geht. Jede Übung soima nämlich 3 moi macha was ma d aBurgamoasta und da gerenga Sepp sicher bestätigen kinnan und bei 3 Weißbier zwischen de drei Saunagänge ziagt si des hoid a bissl. Oder ma bleibt von Haus ausglei bis zum Schluss – wia da schmid Sepp – der auf an Übungsgerät eigschlaffa is am Wegerhof untn, bis a eam de putzfrau gsagt hod dass iaz zum zuasperrn wär.

Wenigstens hamma im Dorf no a boa Leid de des iaz scho kapiert ham dass da Sport nix mehr bringt. Damits des vor eanane Frauen ned zuagebn miassn suachans si si de verrücktesten Ausreden. Da Ortner Erwin zum Beispiel mog nimma Stockschiassn. Deshoib geht er zum Friseur und hackelt mit voller Absicht so dermaßen saubled beim im Friseursstui ei, dass´n a so schmeist dass d´Muihausa Manu fast an Sanka oruafa hod miassn. – de hod´s gfressn eiso wird´s d Frau a glabn. Aber nur a so geht´s. So echt wia möglich muas so a Tarnung ausschau. Da Danzl Kone woit eigentlich ned so weid geh wia da Erwin, und sagt einfach, er hod sein Eisstock verlorn, nachdem eam d´Renate aber glei an neia kafft hod hod a er in den sauern Apfel beißn miassn. Des ganze aus Rausch getarnt foit er nach da Kranzbinderfeier vom Hauke dahoam übers Nachtkastl drüber so dass er sich 2 Rippn bricht, bloß weil er zum bisln aufsteh woit und s´Liacht ned eigschoit hod. Respekt Kone – des is schon o a wenig glaubhafter wia des vom Erwin. Do moani kons passiern dass da d´Renate zum nächsten geburtstag a Granufink schenkt – für eine ruhige und erholsame Nacht. Aber man muas de zwoa respekt zolln, sie san dem sportln entganga – wen a nur fia a kurze Zeit und unta große Schmerzen. I sag ja es muas a jeda selber wissen was er vom Sport hoit. So a da Burgermoasta – aber i garantiers eich – egal was unser Hans de letzen Jahre a sportlich macht – es bringt nix. Zumindest optisch. Des zoagt eiso ganz klar, dass in Peterskirchen dieser Fitnesswahn no ned ganz okemma is.

Und wenns bei uns ums Essen geht da is oid und jung ganz gleich. Nach dem Motto „ Kinda doads as Fleisch aussa damit da Lehrer besser as Kraut hikimmt werd a bei uns im Dorf alles gerecht geteilt. So macht d Angstl Rese 40 verschiedene Sorten Platzerl, de ihra jeds Jahr wida de Schützen zamfressn, und a de Becher Resi teilt de Inhalte von ihrm Schnapslager mit de Theaterspieler was eventuell a do dro gleng is dass auf de Underberg Stamperl de sie dabei ghabt hod no de oide vierstellige Postleittzahl obngstandn is. ---Pause ---

2 Putzfrauen stehn im Bürogebäude sagt de oane I mach jetzt a Diät – guad sagt de andre – dann mach i de fenster.

Aber de absoluten Top3 de beweisen dass mir in Peterskirchen uns nicht dem Diat Wahnsinn vo Deutschland opassen san de folgenden drei Herren. O geh duads mim Hoizmann Josef der sich beim Wirt vorm Bayernspiel a saftigs Hendl, und a viertl Stund drauf an Schweinsbratn eischiabt weil scho a oids Sprichwort sagt : „nur da Not koan Schwung lassen. Da Zach Tobi kon sie im selben Wirtshaus woi ned recht entscheiden und bstellt nach dem Motto „Am Magn drin kimmt ois zam“ auf oamoi a Wasser a hoibe Bier, an kaffe und an Schwäbischen Maultauschenteller – do liegts dann nimma am Bayernspui wenn da schlecht wird. Und Platz nummer 1 geht ganz klar and´n Obergröbner Kone der seid dem Jahr selber kocht und nach dem Motto „Was aufn Tisch kimmt wird gessn“ de komplette Familienpackung Lasagne vom Lidl in si einedruckt…jaja. Saxendi is des Kraut guad hod da Bauer gsagt und hods Schweinere gessn. Ja so iss des mitm Essen.

Wer sie woi a bissl zfui Kraut aussado hod san de Organisatorten der tiertafel. De woitn nämlich eana Jubiläum im Sommer feiern und ham daher beim Andre 200-300 Essen ogschafft und den ganzen Dorfplatz bestuhlt. Leider san grad 15 leid kemma und de ham koa Geld dabei ghabt.

Alte:

Wisst´s es übrigens scho dass sei kon dass ganz Peterskircha moi wida in´dn Mittelpunkt der Weltpresse kemma kannt. Unser lieber Herr griasmeier plant nämlich a Folge von der Serie „der Alte“ in Peterskichen zum drahn. Und wisst´s wo genau. Im Pub.

Und iaz meine Damen und Herren – jeder hod scho moi an Krimi gseng bitte a bissl a Fantasie von alle.

Im Hintergrund sigt ma an Stammtisch vom Ortner Erwin, Schwitze Hellmeier Schane und konsorten, de natürlich scho um 6e dasitzen weil sie sich vorgnumma ham dass im Winter früher zum Wirt gehen und dafia a früher wida hoam. Nachdem ma si bekanntlich ned 2 Sachen gleichzeitig vornehma soi is anur der erste teil von dem ganzen was wordn. Eiso , de 5a 6e sitzen hinten am Disch, vorn sitzt oana mit am grüna oder am rodn T-Shirt und lange blonde Locken der aufgregt mid am Pilsglasl in da Hand am ruhig wirkenden schlaksigem großem de drittletzte Ecke vom viertletzen Heimspiel erklärt. Ganz beim Eingang sitzt oana mid am hoiblarem Weißbier und am Schnauzer der an Witz ind´d laaren Raum eine erzählt über den oanzig und aloa er selm lacha kon. – na ned da Hoizner Ludwig. Hinterm Tresen arbeiten zwoa fleißige Bedienungen und an am Tisch mit 2 Gästen schreibt a kleiner Mann mit Leibe und Kappe die Bestellung auf sein eigens mittgebrachten Block : 2 weißbier

De Kameraeinstellung filmt zerscht 4 ältere Herren de ohne o Wort zum verliern zuerst Karten und dann Geld hin und her schiabn bevors auf an Tisch mitten in da Gaststätte schwenkt wo dieses gfährliche Spiel mit dem gläsernen runden Gegenstand gspuit wird. Nachdem mit diesem Hintergrundbuidl quasi die Hauptpersonen vorgstellt wordn san, schwenkt as Buidl zur Ablenkung des Geschehens aufs Land wo ma an Knecht segt der ganz aufgregt zum Bauern laaft und schreid, hey Bauer da vernascht oana dei Frau am feld draußen. Da Bauer springt auf, rennt ausse und kimmt nach einiger zeit total enspannt und ruhig zruck und sagt: Hey megst mi du verarschen oder was – des is gar ned mei Feld. Danach schwenkt die Einstellung auf Passau wo a 29jähriger mit kurze gschnecklerte Haare wia wuid ummanandaspringt während sei freindin machtlos zuaschaut. Erst im 2ten Filmabschnitt nach da Pampas ultra dry babywindel Werbung wird si rausstelln dass des da Schwoshuber Sepp war der si furchtbar aufregn hod miassn weil er da Oberfeierwehrler agrad da mid da Freindin in Passau war wos in Peterskircha beim Glughammer brennt hod. Aufgrund ana leergramten Lagerhalle in Richtung Pfarrhof ausse im Dorf geht da MordVerdacht zunehmends zu am Kettensägenmörder.

Wida Werbung – spannung steigt Da dritte Teil: und iaz spuits si auf oamoi ois grad no verschwumma ab. A grausiger Fund is gmacht wordn. Im pub leng zwoa junge Burschen – gspuit vom Wengler Jürgen und vom Mayer Korbi aufn Billiardtisch unta ana Abdeckfolie . Des grausigste dabei. Da Jürgen is sogar no nackt. Da Erich sauft derweil 2 hoibe direkt ausm Zapfhahn, da Ecker George schenkt si grod a Betonmaß ei da Gerenger Martin frisst an Kas und de Salami direkt aus da Tuperdose aussa und … ah tschuldigung – iaz hab i den foischen Film eiglegt. Des war des Video vom Moootsch seiner Helmkamera… a was is ja a egal – i mech eich as Ende a gar ned vorwegnemma – i sag grod oans – es wird sauspannend und i bin ma sicher dass mir Peterskirchner guade Laiendarsteller abgeb´n werdn.

Allerlei:

So – auf den Schock auffe dad i song mia dringa no amoi bevor da Endspurt losgeht.

Mia liegn eiso scho no a boa Informationen am Herzen de i eich gern weidagebn mechad. Zum Beispiel oa Frage de bestimmt scho alle lang beschäftigt:

Wia hoasd a Bomerang der nimma zruckkimmt? Genau: Hoizstock.

Na aber iaz ernsthaft. Ihr habt´s bestimmt gwisst dass unsere Böllerschützen des Jahr Jubiläum haben was ihr aber nicht gwisst habt´s is des, dass die Festivitäten do immer nur bis maximal dreiviertel oans in da fria dauern. Soboid nämlich de Kirchauhr sovui schlagt schnappan si alle Schützenfrauen eanane Mana und gehen hoam. Aber ned aus dem Grund dass de Mana am naxtn Tag frisch san sondern weil si unsere sonst so selbstbewussten und bestimmenden Damen wia de Thea, d Marta oder d´Renate fiachten wenn um 1 de Straßenlaternen ausschoitn. Und wenns eich iaz fragts warum de Mana ned einfach sitzenbleim? Ja wer dad dann de ganzen Weißbierglasl abwaschn.

Nur beim weiberfasching derfs a amoi 4re werdn, und de Danzl Renate und dfriedlhuaba Rita ham auf oamoi sovui Schneid dass sie sie sogar vo Emertsham hoamgeh draun – hams zumindest dahoam eanane Mana sagt.

Damit de dann ned gspannan dass doch mid da Becher rese hoamgfahrn san gehns no ins Pub weil Zitat Rita :“a bissl koide fias brauch i scho, sonst glabt er ma ja nia dass i hoamganga bin. A koa schlechte Taktik.

De neie Taktik wia ma Schützenmoasta wird is übrigens de, dass ma a kochts Oa nimmt und des demjenigen an Schädl auffehaut dem ma diesen titel vergunnt. Ja da lachts es aber so san des Jahr da Danzl Kone und de Marta erster und dritte König wordn.

Nur Samstags

Tja was gibt´s no zum verzähln. Genau de älteren von uns werdn si sicherlich no an de scheena Sonntage erinnern kinna wo ma an spaziergang gmacht hod oder wenns was bsunders war amoi a Kutschenfahrt. Heidzutags steign de junga wia da Roy, da Ecka da Hintamoia mei gloana bruada und de Konsorten um 9e vormittag ind´n Zug ei ois oanzige Begleitperson a Kisten bier und fahrn bis um 12e auf Nacht kreiz und quer durch Bayern. Nur in Regnsburg sans moi schnell auf a Schnitzel ausagsprunga. Guad dass de ned an Kone oder an Hoizmann dabei ghabt ham sonst danns heid no z´regnsburg beim Wirt sitzen.

Und hoamgfahrn sans friara a no selber. Ned so wia da da Brand Sebastian und mei Bruada de vo da Stiagn in trostberg nimma hoamkemma san und da brand deswegn sämtliche Arbeitskollegen ogruafa hod. Mid oana Kollegin hod er dann sogar a viertel Stund gratscht – aebr ghoid hodsn trotzdem ned. Jaj de Banker fia an Schmatz sans glei zum hobn aber ausrichten doans doch nix. Hätts es hoid so gmacht wia da Künzner erich auf seiner Weihnachtsfeier beim Michewirt. Der hod a koan fahrer mehr gfundn eiso hod er si spontan beim Michewirt a Zimmer gnumma. Quasi Urlaub in Palling – moi was neis.

Aja – oa Drama hob i no. as fräulein Bauer hod si d´Hand brocha und war deshoib eine ganze Nacht – des miasts eich amoi vorstelln – eine ganze Nacht im Krankenhaus und hod trotz Privatversicherung nicht sofort a zimmer griagt. Völlig gschafft hat sie am nächsten Tag gmoand sie könnte ein Buch schreiben was si in dieser Nacht alles erlebt hat:

Emanzipation

Ihr werds es vielleicht no ned wissen aber nachdem i später a moi a Buach veröffentlichen mecht suach i scho seit am zeitl nach am geeigneten Thema. Erst neilich hab i de Grünen Polikikerin Renate Künast im Fernsehn gseng und da is ma endlich de Antwort auf de Frage „ Womit verhüten eigentlich Emanzen“ eigfoin genau - mim Gsicht!

Nachdem aber a emanzipierte Frauen eanane Sprich haben wia „woach is woach und hart ist hart – aber oiwei woach is a hart – oder Was versteht a Mo unterm Vorspiel – a hoibe Stund betteln“ hab i des ganze Thema moi auf unsa Dorf transferiert, und nachgschaut wias da so laft mid da Emanzipation.

So nach am dreiviertel Jahr Recherche in sämtliche Siedlungen, Aussenbezirke bei junge und oide Paare vo unserm Dorf is mir dann a endlich a Titel eigfoin. „ Die Bedeutungslosigkeit des männlichen Wortes“ Untertitel: „I moa da i des moa wos si a moand. So wahd zum Beispiel im Hause Schwoshuber mittlerweile a ganz anderer Wind. Da jung Alois hod nämlich zum ersten mal seit knapp 30 Jahr nimma a Bayern Dress zum schlaffa o, und a der Bayernschal übern Bett hod ned den Gesschmack der neien Freindin droffa. Dagegn is ja da Amberger Gerhard scho a Zeitl verheirat und woit a amoi de Gutmütigkeit seiner Frau austesten. Er is zum abrechnen zu a boa Bauern gfahrn und glei beim ersten dahoam is de ganze Familie krank im Bett gleng. Aus Sicherheitsvorkehrung hod er glei dahoam bei da Astrid ogfruafa si soi eam doch as Bett woanders macha, weil er hod si gwis mid da Schweinegrippe ogsteckt und ned dass ihra dann woas feid wos doch grad Schwanger is. Eiso fahrt er no a boa Bauern ab und kehrt ganz zufällig zum Schluss beim Scheberger Manfred in Wartmonign ei wo´s ganz zufällig zu zwoad no a ganze Flaschen Schnaps hintrestelln. Am nächsten Tag hod er si dann bis um 3 nachmittag vo da Astrid bemuttern und versorgen lassen weil de ja gmoand hod er hod de Gripp dawischt bis dann der Schwindel aufgfoin is. Auweh - Ja leck mi am Arsch – do häd i ned dauschn meng mid dia. Do kinnan Frauen boshaft sei – und nachtragend. Apropo Boshaft: Was sagt a Frau wenns zum 30jährigen Hochzeitstag an Spiagel eineschaut: Des gschigt eam recht

Da Wimmer Karle pribiert a, dass a seina Frau da Brigitte moi de Meinung sagt und schimpft Weihnachten dass Sie de greisligsten platzerl da Welt macht und sie de ja koam Bsuch ned gebn braucht. Des war leida a Eigentor, weil eam de Brigitte glei drauf ganz ruhig erklärt hod, dass er grod den Wachsengel gfressen hod.

Beim Schwitze woas mas ned genau ob er de Radltour durchs Moorgebiet extra ausgsuacht hod oder ob des a fatales eigentor war jedenfois is d´Marta mitten im Moor steckabliebn, hods as Gleichgwicht verlorn und is mim Gsicht voraus an Batz neigfoin.

Da Wieser Franz hod Ostern voller Stolz as Keabe firedrong damit alle Welt segt wia fui er dahoam zum meldn hod. Nachdem d´Maria vorn dann de Keabe umgstellt hod hod er seins aber nimma gfundn weil er ja absolut koa Ahnung ghabt hod wie der Korb eigentlich asuschaut

Jaja – Mo und Frau – mia mechad scho oiwei a wenig aber meistens geht des ganze nach hinten los. „Wia hod da Lugge zum Kare gsagt. Und, heiratst iaz boid a moi“ jaja sagt da kare, an Antrag hob i ihra scho gmacht aber a bissl dauerts no“ – ja wia des was hodsn gsagt: Du bist da lezte den i heirat.

Oft scheiterts hoid oafach an da richtigen verständigung: Wia hod Osl Susi kurz vorm Schmusn zu ihrm freind an Brugge gsagt: Ähhh Brugge – du stinkst. Und er hod drauf gsagt – iaz hab i extra a Pils drunga weil i woas dassd as Weißbier ned magst.

De Verständigung zwischen Mann und Frau hod a bei da Familie Mayer aus Gerading ned funktioniert, wo de Buam und da Sepp mid 3 Autos in d Kircha gfahrn san, aber de Barbara dahoam lassn ham. Wo iaz de Männer nix dafia kinna ham is des dass sie de Barbara dann a no dahoam aussesperrt aber in so na Situation verstehn´s de Frauen durchaus dass ma des a no auf de Schuid der Männer schiabn kon.

A da Pastl Tobi hod a boa Probleme ghabt mim Verständigen wia er sei Holde um 5e in da fria bei starkem Schneefall vom Pub abhoin woit, und zu ihra gsagt hod si soi eam scho moi entgegn kemma. Er hod natürlich a nimma fahrn derfa – eiso dahoam auffe aufs Radl umme um de erste Kurve – kimmt eam da Schlegl Dominik entgegn und des is dann a glei a so a lustigs Gespräch wordn, dass er erst wida an sei Ursprüngliches Vorhaben denkt hod wia sei Dame pritsch nass dehaganga kimmt. Aber nachdem da Tobi a echter Gentleman is hod ers dann de letzen 30 Meter no auf seim Gepäckträger midgnumma.

A a weng Probleme mim Radl hod a da Muihausa Manu ihr Freind da Lugge ghabt. Ganz liebevoll hod er extra no an Nierngurt vo da Manu midgriagt wia er ins Pub gfahrn is den er si aber sparn kinna hätt weil so schnell war er beim hoamfahrn ned dro. Er hod nämlich scho am oidn Sportpaltz drauss an Plattn ghabt und dann as Radl bis zum Koanauer auffe gschobn. Spätestens wiasn dann beim Hosenausziang im Schlafzimmer gschmissn hod, und er zum bisln as Schrankdial aufmacha woit hod dann a d´Manu gspannt warum er si ned oruafa draun hod dassn hoid. Und dann, wenn eigentlich eh scho alles klar is kinnans de Frauen einfach ned lassen nomoi nachzumbohren und in de eh scho aufgrissenen Wunden Salz zum strahn. Des head si dann ungefähr a so o: „Wia vui hostn drunga? Genauso vui wia da Schelina gerle ! „ und wia vui hod der drunga ? Genauso vui wia i“ - ja recht hod er – Wenns a oiwei so blede fragen stoin.

Bled gfragt is a da Huaba bauer worn wiara a de zeitung einegruafa hod und gsagt ganz gschamig gsagt hod. Grias gott, bittschön, i mechad gern a Heiratsanzeige aufgebn. Einspaltig oder zweispaltig?? Ja gibt´s des a ???

Buam und dirndl

Blede Fragen hod si a de koitenhauser Elfi gfoin lassen miassn wia ihre Buam vom Steffanischnapsln ned hoamkemma san. Zerst weckts an Schane auf und fragt„du de san no ned dahoam – machst da du koane Sorgen“ Ganz aufrichtig und anteilig sagt da Hans „doch scho „ draht si um und schlaft weida. Eiso d Elfi aussa ausm Bett alle Dirndl abgfahrn wo de Buam sei kannt´n und dann der rettende gedanke – Pub. Ja genau – da flaggans dann a de zwoa und no a irgenda Engelbsberger der nach einem riesen Anschiss vo da Elfi de nüchterne Frage stellt: „ Und was regst di iaz du nachad a so auf“ Des häd eigentlich dann scho glangt aber da Ali hod moi wida alles toppen miassn in seim Rausch, bleibt ganz ruhig und sagt. „So Mama – und iaz kannst eigentlich wida hoamgeh“ ohhhh – der hod si am nächsten Tag mid Recht im Zimmer eigsperrt weil er si scho gfoachten hod vo dem was kimmt.

Jamei mid so boa Buam is scho a gschieß, des wird ma daherinn jede Muadda bestätigen kinna dawei san doch de meisten eh so brav. De Koitenhausers zum Beispiel werdn ja meistens unschuldig verdächtigt – so is da Schane stinksauer weil er Handwerker im Haus hod und de Buam han moi wida ned vom Furtgeh hoamkemma dass helfa kunntn – derweil schlaffans ob´n im Bett und er hods ned gwusst. Oda mei gloana Bruada und da Gerauer Sebastin . Wo sie andere beim Steffani Schnapsln sinnlos besaufen oder gar de Dirndl odappan, gehn de 2 bei da Ortner Sonja einfach zur Karin as Wohnzimmer und schlafan neb´n ihr auf da Couch ei. Des hod bestimmt liab ausgschaut. Oda da Köck Mane. Der is scho so erwachsen wordn dass er bei da lezten Miana Hüttn Party nur no zum aufbaun obefahrt und dann um 8e wida hoam. Deswegn weil er nimma steh kinna hod vor lauta Rausch muas ma ja da Mama ned unbedingt auf d´Nasn bindn. Oder da Erl Stefan griagt aufn Mallorca Urlaub nachm dritten Tag Ballermann an sentimentalen Heimwehanfall und ruft d Mama o si soi´n doch bitte hoin. Naja- kurz drauf is er aufn Barhocker eigschlaffa und si ham eam de Kamera klaut. Oda a da Pastl Tobi – feiert sein Geburtstag bei eam dahoam – alle hupfan und feiern und singan und schrein, nur er schlaft brav zam mid seim Papa auf da Couch ei. Und einige Buam han ned grad brav sondern a no total gscheid. Mama, hod friara da gloane Watsche dahoam ganz stoiz verzoit – heid hob i in da Schui a Frage beantworten kinna. Ja ganz guad Reinharde hods gsagt was denn fia oane? – Wer hod da an Schoas lassn? Aber meistens stelln ja de Kinder de Fragen. Du papa was isn verlobung hod as Drindl vom Oistui Andreas an Wase gfragt: Herschafft wia erklär i jetz des denkt si da Andreas: eiso - des is ungefähr a so wia wenn du auf Weihnachten a neis Radl griagst aber erst Ostern damit fahrn derfst. A so is des moands Dirndl– aber Leidn derf ma vorher scho ?!?. Unser Vorzeigesohn is nadialich da Wimpersinger Christian der sie den Fehltritt erlaubt hod dass er vom Harpfinger Bierzelt nimma hoamkemma is und fremdgenächtigt hod. Damit des ganze dahoam ned auffoit kafft er beim Bäcker z´Harpfing glei no frische Semmen und Brezen und tramt dann mid am älteren Herren hoam. Tja Christian, eiso dass da dei Mama bei dea Fahne, und de dreckigen Sachan ned obkafft dassd grad an oidn Rentner Fahrstundn gebn host der da dann Semmen gschenkt hod häd da i a sagn kinna, von dem her war des Schimpa scho gerechtfertigt. Aber i dad sagn da guade Wille war auf jeden Foi da. Und do dad no oana sagn mid Buam hod ma Probleme .

I glab ja dass de Dirndl vui schlimma san. Wia hod da Hellmeier Peter zu seiner 20 Jährigen Silvia gsagt: „So Dirndl iaz wersd dann draufa erwachsen, dassd ma fei immer schee artig bleibst „ Ja freili hod d´Silvia gsagt – wenn i meim Freind an Thomas draun derf war i gestern sogar großartig“. Jaja de Dirndl in da heitigen Zeit. De Ortner Sonja nimmt zum Beispiel auf jeds Fuasboi spui 3 Verschiedene Outfits mid, weil si woas ja no ned wo´s danach higeht. Aber de hod wenigstens was o. Da Ortner Erwin hods gar ned glabn kinna wia er in da Sauna oane gseng hod de a Intimpiercing ghod hod. Hod er glei am Stammtisch verzoin miassn und jeder der an Erwin kennt wia er was erzählt wenn er sie aufregn muas – eiso jeder – woas dass des bestimmt a Highlight war. D´Schwoshuber Agnes hod alle Leid erzählt dass ihr Mama in Traunstoa im Krankenhaus is statt in Trostberg- dass des aber ned böswillig war merkt ma dadro dass sie selm a auf Traunstoa zum bsuacha einegfahrn is.

Und unserm Burgermoasta seine dirndl? De werdn zwar um 12 brav vom Papa ghoiit kinnan den aber dann no überredn bis um 3 im Pub sitzen zum bleim. Ja Hans, Gott sei Dank hast du in Tacherting unt´n mera Durchsetzungsvermögen sondt hätt ma nächsts Jahr koan Wirt nimma ghabt und da fia an Christbamwoid.

Ma segt eiso weder de Buam no de Dirndl san ganz unschuldig. Von dem her versteh´s i´s eigentlich ned warum in Peterskirchen de meisten grad no Dirndl griang? Vielleicht wissen aber a de Herren der Schöpfung einfach ned wia a Bua geht. Herr Daschil, Herr Rannetsberger Herr Scherer und co. Habt´s woi no nia an Kuacha gmacht ha? Iaz riats amoi dahoam an Kuachadoag o und dann doads an Finger ganz schnell eine und wida aussa. Na werds seng dass a Loch bleibt. Iaz doads dann denn Finger ganz langsam eine und a langsam wida aussa und i werds seng dass a gloans Zipferl überbleibt. Dass ma eich a oisand sagn mua. So a bua is doch a total liab und der verändert si a nimma. Soi i eich amoi a beispiel erzoin von am großen und am gloana Bua de in der selben Situation gleich reagiern. Da 2 Jäjrige Fabian vom Osl dohoam hod von seim Bruada am Breggal seiner Laptobtastatur des L aussabrocha und hods gfressen. Nachdem er anhand vom Breggerl sein Gsichtsausdruck gmerkt hod dass ma des ned derf hod ers sofort am nächsten Tag wida hint aussalassn und somit is des L wieder am richtigen Platz. A großa Bua – da Hoizner Bax – hod beim wiesa aufn festl über de selbige Laptoptastatur a ganze Hoibe Bier drüberglaht. Nachdem er anhand vom Gsichtausdruck vom Breggerl gmerkt hod dass ma des ned derf – hod er s Laptop einfach aufn Kopf gstellt und hods ausslaffa lossn. Do segt mas wieda dass mia Buam zwar a bissl dumm geborn san mia uns aber wenigstens nimma verändern.

Aber ihr wisst´s es ja selm. So unterschiedlich Buam und Dirndl – Mana und Frauen a san – es is oiwei gleich: Mid eana geht´s ned und ohne eana geht´s erst Recht ned.

Am alla scheensten is jedoch wenn alle zamma in so am scheena Dorf wia Peterskircha leb´n wo ma si gegenseitig unterstützt, midanand obackt und wo bei …. Einwohner …. Leid as Starkbierfest kemman.

Mid dem großen Dank an eich mecht i mi des Jahr Verabschieden mid der wundervollen Bayrischen Redewendung:

PROST

Solang in Bayern Jung wia Oid a jeder wos auf d Hoamat hoid

A jeda guad mim andern lebt und jeda nochm zfriedn sei strebt…

Drum sauf ma iaz… und i wünsch eich heid

Dass koane moang beim Weko speibt